Ang Kainit sa Adlaw og Gugma sa Dios

Ang Kainit sa Adlaw og ang Gugma sa Dios

Sa matag adlaw anaa ang adlaw sa kahitas-an
Mo-ulan man o mounos ang adlaw anaa ra
sa kapunawpunawan og mopakita sa iyang
dagway sa iyang kaugalingong pagbuot.

Mobagyo man og mosunami, mobangis
man ang hangin nga mopalupad sa mga
kahoy og kabukiran, mobaha man ang
yuta tungod sa tumang ulan, ang adlaw
dili gayod mawala sa iyang gibarugan.

Ang adlaw sa iyang paghayag nagpakita
sa gugma sa Dios nga kanato nagahikap
Kini moabot kanato bisan pa man atong
siradohan ang dapit diin atong gitagoan
Ang silaw sa adlaw mopadayon sa pagsulod
og paghikap sa atong kalawasan, timaan sa
gugma sa Dios nga walay kabug-tuan.

____________

Commitment to Service, 60x70 cm, acryl on canvass, by Elizabeth Padillo Olesen)

June 20, 2012

Tanaman Ilalom sa Adlaw

Ang mga dahon nagpaabot nga bisbisan
sa silaw sa adlaw, human sa mga adlaw
sa katugnaw og madagayaong ulan.

Mga bulak nga misugod sa pagbuklad
nangayo sa kainit sa adlaw aron matuman
ang pagbuklad sa iyang mga gihay.

Ania na usab ang hagawhaw sa kasingkasing
nga unta ang adlaw sa langit mopakita
sa iyang panagway aron sa pagdan-ag. 

Kainit sa Adlaw Nahanaw

Ang kainit sa adlaw nahanaw na usab
Sulod sa pila ka adlaw kini nagadan-ag
og nagahatag ug pahiyom sa panagway
ang karsada may awit nga gitogtog
ang tanaman nagabuskad sa katawa
sa mga bulak og mga nagkatawang bunga.

Kanus-a ka na usab  mohayag sa yuta
mopahiyom og mosayaw sa among mga mata?
Kanus- a ang imong bidlisiw mopukaw
sa among mga damgo og paghanduraw?
Pangayoon ko ang imong silaw
nga mohatag og kusog og kainit sa
akong tanaman aron ang mga bulak
magadan-ag sa tibook kalibutan.

Ihatag ang Kainit

Ako nagpaabot sa mga bulak nga mobuklad
gikan sa kinahiladman sa yuta, kini mabanhaw
pinaagi sa iyang gihay og katahum sa mga mata.
Akong gipaabot ang kahayag gikan sa adlaw
nga magapukaw sa mga liso nga natulog sa yuta.
Apan anus-a ang kainit motunol sa iyang kamot
sa pagbanhaw sa yuta nga natulog og nagahulat?

Kainit sa Kasingkasing

Ang kasingkasing nagadilaab sa pag-ila sa katahum sa yuta
Giunsa sa mga liso sa pag-tubo gikan sa iyang kamatayon
sa diha nga siya gitabonan sa yuta, giunsa sa mga bulak
sa pagbuklad sa iyang mga gihay og pagpakita sa dakong
kausaban sa iyang pagtubo nga sa hinay hinay nagasabwag
sa iyang katahum sa palibot og sa mga mata sa tawo
nga nagatan-aw.

Unsa ka kaanindot sa imong kabuhatan, O Dios,
 ikaw nga nagpanday og nagmugna sa katahum
sa palibot, sa yuta nga imong gidalit kanamo ingon
nga imong gasa gikan sa imong gamhanang mga kamot.
Kanimo among ihatag ang nagdilaab nga kalipay
og pagpasalamat sa imong tibook kabuhatan
nga naghatag og kalipay sa among kasingkasing
diha sa pag-ila sa katahum nga walay katumbas.

__________
April 2, 2012

Ang Kainit Mipuli sa Kabugnaw

       (The Heat takes over the cold...)

Sulod lamang sa pila sa adlaw og semana
anaa na usab kita sa laing panahon
diin ang adlaw nagsud-ong ubang sa dakong
pahiyom og katawa pinaagi sa iyang silaw.
Ang landong sa katugnaw nag-anam og
kahanaw og gipulihan sa kainit sa adlaw.

Pahiyom, sayaw, lukso og singgit
sa kalipay nga imong matagamtam
ang kagawasan sa pagbiste nga dili
giputos sa kabag-on; ang imong mga
tiil wala giputos sa sapatos nga
magahatag og kainit sa imong mga lakang.
Pahiyom, sayaw og lukso sa kalipay
nga ang adlaw mipuli sa kabugnaw!

Kabugnaw sa Yuta (The Cold Earth )

Human sa mga adlaw sa yelo
nga nagatabon sa kadalanan,
tanaman og kabalayan,
ania mitakyop kanato
ang tumang kabugnaw
nga sa lawas makapakurog.

Human sa mga adlaw
sa yelo nga nagapintal
sa palibot ingon nga putling
baybayon, ania na usab
nahulog ang ulan nga maoy
natunaw sa yelo nga mabugnaw.

Nahulog sa yuta o natunaw
ang kabugnaw nagapadayon
og kablit sa atong kalawasan.
Ang matag-usa nangindahay
sa kainit sa adlaw nga mosilaw.

___________
February 22, 2012

Kabuang sa Tawo (Man's Folly and Idiocy)

Kung siya dili matudloan
Kung siya magmagahi
sa pagsabot og pagsunod
Kung ang iyang mahimo
mao ang pagpalagot og
pagbatok sa kaayohan.


Kabuang sa tawo
kung ang pagsabot
lumsan sa kalagot,
og dili tiaw nga pagdumot
Kung ang tubag magtinguha
sa pagwakli  sa bili
sa tawo nga gikalagutan.


Kabuang sa tawo
kung ang garbo mao
ang magpatigbabaw
uban sa paghikalimot
sa kagawasan nga matag
usa gikuptan og angay
nga tan-awon og respetohan. 

Kangitngit og Kahayag

Ang Kangitngit ang Kasilag

Ang kangitngit mangitngit

nga nagangitngit sa atong dalan

Ang kahayag lamang mao 

ang makahimo sa pagguba

sa kangitngit.

Maingon nga ang gugma

lamang mao ang makahimo

sa pagdaog sa kasilag.

Ang kangitngit madaug

pinaagi sa kahayag

maingon nga ang kasilag

madaug pinaagi lamang sa gugma.