Padayon ang Adlaw sa Paglaylay

Misulaw na usab ang adlaw
Laing adlaw og mga adlaw
nga ang maong kahayag nagadan-ag
Sa kasingkasing nga nagbangutan
ang adlaw nagahatag og pahiyum.

Padayon adlaw sa paglaylay
sa imong awit sa kasingkasing
Padayon adlaw sa pagdilaab
sa gugma nga mahatag ngadto sa
matag usa nga akong makita karon.

Paglubong ni Anja Uban sa Silaw sa Adlaw

Karong buntaga among gilubong
ang usa ka inahan sa akong estudyante
Sulod sa simbahan nagpunsisok
ang nga kaeskuyla, magtutudlo,
higala, silangan og familya
sa pagdala sa lawas ni Anja
ngadto sa mga kamot ni Bathala.

Usa ka gatos o sobra pa
ang miduyog og mipadayag sa ilang
kasubo sa pag-ila nga ang usa ka
inahan nawala gikan sa iyang bana
og duha ka mga anak sa pilok sa mata
Siya nahanaw uban sa iyang katawa,
pagmahal og mga handumanan sa iyang
pakigkauban og mahuluganong presensya.

Niining buntaga among giubanan
ang familya og si Anja ngadto
sa iyang puluy-anan nga walay
pagkadugta, puluy-anan nga kitang
tanan maoy padulgan sa pagpilok sa mata.
Niining buntag ang kahayag sa adlaw
miduyag sa paghatag sa iyang kainit
ug gugma ngadto sa mga dughan nga
nagbangutan niining adlawa.

Kaanindot paglakaw gikan sa simbahan
human sa paghandom ni Anja ngadto
kahayag sa gawas gikan sa silaw
sa adlaw nga nagadan-ag og nagmaymay.

Ang Kabugnaw sa Kasingkasing

Mahanggaw ang kabugnaw sa kasingkasing
sa diha nga ang kapikas sa kinabuhi
di man lang manumbaling sa kapikas
bisan pa man siya nasakit og naguol.

Ang kabugnaw sa kasingkasing mahangpaw
diha sa mga gutlo diin ang kapikas
di man lang manumbaling sa pagtubag
sa pangutana nga nagkinahanglan og tubag.

Ang kabugnaw sa kasingkasing masinati
diha kung ang kapikas gibali wala
sama sa usa nga wala magatindog nga buhi
sama sa anino lamang nga mahanaw og lumalabay.

Ang kabugnaw sa kasingkasing nagkinahanglan
sa kainit adlaw, sa adlaw nga magdilaab
sa kainit unta sa gugma nga dili mahikawan
sa pagpakita pinaagi sa buhi nga timaan nga makita.

Tugnaw Bisan Pa Man sa Silaw sa Adlaw

Tungod sa kahayag sa adlaw
giputos ko ang akong lawas
sa biste nga alang sa panahon:
nipis nga saliko, gamay nga sapatos
og nagwagtang sa daghang putos sa lawas.

Ang kahayag sa adlaw
nagtanyag sa tawo nga mahimong gawasnon
gikan sa daghang panapton nga gilimin
sa panit og kalawasan.
Ang adlaw nagahatag sa tawo sa kagawasan
sa paggawas ingon nga matuod nga tawo
gikuhasan sa kaugalingong pagtago
og pagpakaaron-ingnon ngadto sa pagkamatuod
nga tawo.

Ang Katugnaw

Unsa katugnaw sa palibot
kung mawala ang kainit sa adlaw!

The Covenant, 30x40 cm, acryl on canvas, painted by Elizabeth Padillo Olesen 

Ang Katugnaw

Unsa kamingaw sa palibot
kung wala ang kainit sa gugma
sa atong mga minahal!
Unsa ka kalilom sa mga balod
sa dagat kung walay mabahinan
sa hudyaka nga atong masinati
sa dughan, sa palibot nga gipuy-an
og sa mga hitabo sa kapanahonan!

Elizabeth Padillo Olesen (written originally in Cebuano language)
March 21, 2016

Translation from Cebuano to English


The Coldness


How cold is all that surrounds us
when there are no rays of the sun!
How lonely our surroundings could be
if there were no  love from the hearts
of those whom we love!
How silent are the waves of the sea
when there is no one to share
the joys we feel in our hearts,
in our surrounding habitat
and in the joyful events in our time!


Translated also by Elizabeth Padillo Olesen from Cebuano to English
March 21, 2016

Human sa Ulan

Human sa ulan ang malipayong panagway sa adlaw
nagpakita na usab,sama nga nagalaylay og awit
sa katawhan kinsa nagahulat nga ang tubig gikan
sa langit mohunong na sa pagtagak og pagsibwak.

Karon nga ang tubig gikan sa langit mihunong
na sa iyang pagbisbis, karon nga ang kainit og
kasulaw sa adlaw nagpakita, panahon na usab
sa paggula, sa pag-ugmad sa yuta og tanaman.

Ang palibot gilikosan sa mahigugmaong gakos
sa adlaw nga naghatag og kalipay og kusog.
_______________

(After the rain
comes the sun
to embrace us
with joy and strength)