Kainit sa Adlaw

Ang Kainit sa Adlaw

Sa Pilipinas ang kainit sa adlaw giila nga kabug-at ilabina kung kini mosangpot sa tumang kahangos, kauhaw og pagkamatay sa mga tanom og halaman. Ang magasakay sa mga gagmay nga banka magtabon sa ilang mga nawong og lawas aron lamang ang kainit sa adlaw dili makahikap sa ilang panit nga magahatag og buwag singot og sama nga napaso sa kalayo. Ang tumang kainit sa adlaw wala gidawat uban sa kalipay ilabina sa mga nagbiyahe og naglakaw sa karsada.

Apan tinood ang kainit sa adlaw gikihanglan aron ang tanom mabuhi og mobulak og molambo. Ang kainit sa adlaw gikinahanglan aron ang mga nagabiyahe mopadayon sa biyahe sa walay kahasol sama sa mahatag sa ulan. Ang kainit sa adlaw nagahatag og kusog sa atong lawas, nagahatag og vitamin D nga makuha lamang sa bidlisiw sa adlaw nga nagalig-on sa atong kabokogan.

Apan ang tumang kainit sa adlaw gikahadlokan sa katawhan kay nagpasabot usab ilabina sa gagmay nga kaislahan nga ang tinubdan sa ilang tubig nga mainom gikan sa ilang mga tabay mahimong parat. Kini nagkahulugan sa kamatayon sa mga tanom og mga kahayupan. Kini nagkahulugan sa tumang kauhaw ug kasayon nga pagtakboy sa balatian.

Apan dire sa Europa ang kainit sa adlaw human sa taas nga winter og panahon sa yelo og katugnaw, ang adlaw usa ka tinubdan sa dakong kalipay. Kalipay nga makahimo na ang katawhan sa pagguwa gikan sa ilang kabalayan sa walay pagsul-ob sa daghan bahin sa biste aron lang nga maputos ang lawas gikan sa tumang katugnaw. Kini nagkahulugan nga ang matag usa may kagawasan sa paglakaw sa kadalanan sa walay pagsul-ob og bug-at nga sapatos aron dili madakin-as. Nagkahulagan nga ang matag usa may kahigayon sa pagpadagan sa iyang sakyanan sa bisan asang dapit adtoan sa walay pagpaabot kung unsa ang hatag nga adlaw nga report sa kinaiyahan.

Ang kainit sa adlaw ginadawat sa tumang kalipay og kahinam alang sa gawasnon nga kalihukan gawas sa balay og sa kaugalingong palibot nga harden uban sa kabulakan og kakahuyan.

Abril 24, 2010, Elizabeth Padillo Olesen
sa Cebuano nga lenguahe