Nahanaw nga Kainit sa Adlaw

Misugod na usab ang kangitngit

ang yuta nawagtangan sa adlaw

mora og gilamoy sa kangitngit

nga mitakyop sa yuta sa alas kuarto

sa kahaponon og kagabhion.

Ang kangitngit nagadala sa tumang

kabugnaw bisan pa man wala pa

mahulog gikan sa kahitas-an ang

yelo sa kabugnaw nga maoy magatabon

sa kakahuyan og tibook tanaman.

Apan ang kainit nga nawala

napulihan sa kainit sa gugma

nga gibugwak sa kahitas-an

pinaagi sa pagpadala sa labing

mahal nga gasa sa Gugma

nga mao ang pagkatawo sa

Manluluwas sa katawhan

nga mao si Jesu-Kristo.

Siya nag nahimong kahayag

nga nagadan-ag, nga nagagiya

og nagdilaab sa kasingkasing

sa matag-usa diha sa baruganan

nga ang Dios kanato nakigkauban .

Kainit sa Adlaw og Dagat sa Gugma

Dad-a ako ngadto sa taob sa dagat

diin ang tubig maingon nga dili mahubas

Dad-a ako ngadto sa tumoy sa panganod

diin didto ipahulog ang ulan nga mobanlas

sa yuta.

Dad-a ako ngadto sa alisngaw sa adlaw,

ngadto sa kainit nga nagatandog sa dughan

ngadto sa kainit nga naghatag sa kaputli,

kaputli alang sa lalom nga pagmahal og pag-atiman.

Dad-a ako ngadto sa adlaw nga naghatag

kanato sa kainit aron mabuhi, mabuhi

alang sa pagsilbe, sa pagmahal, pag-amoma

og pag-atiman. Dad-a ako ngadto sa dagat sa gugma.

Elizabeth Padillo Olesen with painting entitled: No Man Is an Island
                                                                  30x40 cm, acryl on canvass with steel frame.

(November 20, 2011)